ကျုပ်ဘဝတစေ့တစောင်း(၈)

မနက်စောစောထ ကားစီးရမယ်ဆိုပေမဲ့ ညဥ့်သန်းခေါင်လောက်ကတည်းက နိုးနေကြပါပြီ (ကားမမှီဘဲ ကျန်ခဲ့မှာကြောက်လို့)။ ကားက ကုန်တင်ကားဆိုတော့ ရွာကနေ မုံရွာကိုပို့မဲ့ ပဲ၊ နှမ်း၊ ဂျုံ…စတဲ့ သီးနှံအိတ်တွေကို ညကတည်းက ကားနဲ့လိုက်ပြီး တင်ထားရပါတယ်။ မနက်ကျရင် ခရီးသည်တင်ပြီး တန်း..ထွက်နိုင်အောင်လို့ပါ။
ရွာဦးကျောင်းက နံက် ၄ နာရီ တုန်းခေါက်သံကြားတော့ ကျုပ်တို့လည်း အိပ်ရာကထ၊ မျက်နှာသစ်…. မိဘ ၂ ပါး ကို ရှိခိုးကန်တော့ကာ ကားစီးစုရပ်ဖြစ်တဲ့ ရွာလယ်ကဘုရားကြီးဆီကို ထွက်လာခဲ့ပါတယ်။ ကျုပ်ညီတွေ(ဝမ်းကွဲတွေရော)က လိုက်ပို့တာပေါ့ဗျာ။ ညီအစ်ကိုတွေပေါတာ ဒီနေရာတော့ အသုံးဝင်တယ်ဗျို့။ ဟိုရောက်တော့ ကားက ကုန်အပြည့်၊ လူအပြည့် နဲ့ စောင့်နေပါပြီ။ စက်ဘီးနဲ့အိတ်ကို ကားပေါ်တင်(စက်ဘီးက ဘေးနံရံမှာကြိုးနဲ့ချည်တာပါ)၊ ကျုပ်တို့လည်း အပေါ်ရောက်အောင် မနည်းတက်ပြီး အိတ်တွေပေါ်မှာ တစ်ယောက်အပေါ်တစ်ယောက်ထပ်လို့ ထိုင်ရပါတယ်။ တအောင့်လောက်ကြာတော့ ကားကြီးက ရွာကနေ..မုံရွာရွှေမြို့တော်ဆီ တအိအိနဲ့ ထွက်ခွာခဲ့ပါတော့တယ်။
တကယ်က ကျုပ်တို့ဆီကနေ မုံရွာကို တိုက်ရိုက်ရောက်တယ်လို့ မပြောနိုင်ပါဘူး။ ချင်းတွင်းမြစ်ကြီး ခြားနေလို့ပါ။ ကျုပ်တို့ရောက်တာက ချင်းတွင်းမြစ်ရဲ့ဒီဘက်ကမ်းဖြစ်တဲ့“ညောင်ပင်ကြီး” ဆိပ်ကမ်းကိုပါ။ ဟိုဘက်ကမ်းဖြစ်တဲ့ မုံရွာ ကိုတော့ လှေ၊စက်လှေ နဲ့ ဇက်(သဘောင်္နဲ့ဆွဲ-တွန်းရတာပါ)တို့နဲ့ ကူးရတာပါ။ အလျင်လိုတဲ့သူတွေကတော့ ဈေးနည်းနည်းကြီးပေမဲ့ စက်လှေနဲ့ကူးကြပါတယ်။ ကားပိုင်ရှင်တွေကလည်း ကုန်များရင် ကားပါဇက်ပေါ်တင်ပြီး မုံရွာအထိ လိုက်ပို့ကြပါတယ်။ ကုန်နည်းရင်တော့ ဒီဘက်ကမ်းမှာဘဲ စတည်းချတတ်ကြတာပေါ့။